Ilul Yuba gh Dcheira, yat tmedint mezzîyen illan gh tama n Agadir. Ghin nit agh izzri mezzîy nnes. Lligh n imqqur s imik, ittut zund kigan n ayt tmazirt ns s usurs amazdar n idels nnes, idels amazigh. Mkan af yusi afrak ar isiggil man tigharasin as rad yaws gh ussfrek ns, immagh f tussna tunsîbt s uggug ad amezwaru n tmagit tanamurt n Merruk. Issnti ar ittara amarg s tmazight afa d imel tayri ns i idels ad, urta iga azêmmazl ns izwarn gh ubaraz n uzawan.

Ifels mas iga uzawan yan imis isugren gh ubrid n tamaght, isnti ar ikkit idinanen n tgitart yawes gh tlalit n yat trabbut n umarg. Mqqar fellasn tqqen tenbâdt abrid n isuyas, ighi Yuba ad isker mennaw imddrzen gh kigan d temdinin n Merruk ississan anaw n umarg nnes ger tugget n imarayen n umarg amazigh. Azawan ns ard ittagwm gh idles ns azayku, gh usala ns idran, mac Yuba ihâbbl tarmiwin n wiyyâd, ihîyl i inmuggar d idlesan n umadâl. Snat tsffifin lli d idî Yuba ar mmalant tafssa ns f ad isflujju amarg issackid iwaliwn isnmili azawan.

Gh 2000, tasffift ns izwarn tawargit lli yura, iga s tiyyet, yirirt tssen agharas s ulawen ggutnin gh Merruk. Gh 2005 issufghd tis snat ngr Merruk d Uliman ig as Itran Azal nttat agh isatig imasn iqburn n darsn zund lutar, ahjhuj, amzâd (rribab), ganga, tallunt, tiqerqawin, nnaqus d wiyyâd. Asml Tudert ad imla yagh yan Yuba yadênin, Yuba izêdârn ad if tudert yadênin i imasn imazighn imzwura, amzâd ngh rribab lli ilan aghar yan udinan, iggammi ad lli an izri igran n Sus, igwdl f imzgan ur isslflidn i tamazight. Yuba imla rribab i willi t ur issen, tasffift igwran n Yuba tga tamghra ngr imassn n idels amazigh d imasn n umadâl. S tugga n mnnaw infran, amarg n umdyazn ngh aàzri ikkisd amarg amazigh n rways d win uhêwac gh tfulklurit d tatut isles as timlsit tamaynut igt d isli ngr izawann n wiyyâd.

Asml urt igi ikter s taghlaghat n tagnawit, amarg n tgnawit yusin tabrat urd tagnawit aghar i tgnawit, gh wanaw ad gh uzawan Yuba issimghur willi izzîdêrn i tissumga « isggurad ufgan tissumga, idîd assudn ufus d ays ntbndaq, d ays nttini sidi mqart ur igi ».